ანტიოქიის ეკლესია შველას ითხოვს! ანტიოქიის უწმინდესი პატრიარქის იოანე X-ს მიმართვა მსოფლიოსადმი

დამასკო, 6 დეკემბერი 2013 წელი
პრესკონფერენციაზე, რომელიც შედგა დამასკოში 5 დეკემბერს, ანტიოქიისა და სრულიად აღმოსავლეთისა პატრიარქმა უნეტარესმა იოანე X-მ მიმართა მსოფლიო საზოგადოებას განცხადებით:
“სირიაში ამ ძნელბედობის და უბედურების ჟამს, ამ საშინელი სისხლისღვრის დროს, რომლითაც დაიტბორა ჩვენი ხალხი, გაურკვევლობაში, ბუნდოვანებით მოცულ სიტუაციაში, რომელიც ეხება ჩვენი მიტროპოლიტების იოანეს და პავლეს ბედს ალეპოში, – ამ მწუხარების ჟამს ანტიოქიისა და სრულიად აღმოსავლეთის საპატრიარქომ მიიღო ცნობა მისი შვილების შეპყრობის შესახებ – მონაზვნებისა და ობოლი გოგოების, წმინდა თეკლეს მონასტრიდან მაალულაში – და მათი იაბრუდში გადაყვანის შესახებ, ამა წლის 2 დეკემბერს.
ჩვენ შევხვდით ამ ცნობას უდიდესი ტკივილით. და რადგანაც პირველმა მცდელობებმა მათი გათავისუფლებისა ვერ მიგვიყვანა შედეგამდე, ანტიოქიისა და სრულიად აღმოსავლეთის საპატრიარქო მიმართავს მსოფლიო საზოგადოებას, მსოფლიოს ყველა ქვეყნის ხელისუფლებას, თხოვნით, რათა მოხდეს ჩარევა და დახმარება ტყვეების გათავისუფლებაში.
ასევე ჩვენ მოვუწოდებთ ამ ადამიანების სინდისს, ჩვენ ვაფიცებთ მათ იმ ღირსების მარცვალს, რომელიც დათესა უზენაესმა შემოქმედმა ყოველი ადამიანის გულში – გამტაცებლების გულშიც კი: გაათავისუფლეთ ჩვენი მონაზვნები და თავშესაფრის აღსაზრდელი გოგოები.
ასეთია ჩვენი მიმართვა მსოფლიო საზოგადოებისადმი: ჩვენ მადლიერებით ვიღებთ ყოველ თანაგრძნობას, მაგრამ ჩვენ აღარ ვსაჭიროებთ „წუხილს“, „დაგმობას“, „შეშფოთებას“ შექმნილი ვითარების გამო – რამეთუ ეს ყველაფერი მოქმედებს ჩვენს სინდისზე. გვესაჭიროება მოქმედებები – გადამწყვეტი და ნაყოფიერი ქმედებები – და არა ცარიელი სიტყვები. ჩვენ არ გვინდა გვესმოდეს „დამგმობი“ რეპლიკები იმ ადამიანებისგან, რომელთაც გააჩნიათ ძალაუფლება – რეგიონალური თუ საერთაშორისო, ჩვენ გვინდა დავინახოთ რეალური მონდომება, რეალური ზეწოლა, რაც მიიყვანს საქმეს ტყვეების გათავისუფლებისკენ, რომელთა ერთადერთი „ცოდვა“ ისაა, რომ მათ უარი თქვეს საკუთარი მონასტრის დატოვებაზე. ისევ და ისევ ჩვენ ვიმეორებთ ჩვენს მოწოდებას სირიაში ბრძოლის ლოგიკის შეცვლაზე სამშვიდობო დიალოგით, რადგან სირია სისხლისგან იცლება და მისი ჭრილობა – ჩვენი გულების ჭრილობაა.
დაე გაიგოს ყველამ, ამ მიწაზე დაღვრილი უდანაშაულო სისხლის ერთი წვეთიც კი, წმინდაა და ძვირფასია მსოფლიოს ყველა სიმბოლოზე.
დაე მიხვდეს ყველა, რომ ჩვენი მართლმადიდებელი ეკლესიის ზარები, ჯერ კიდევ უძველეს ეპოქაში ამაღლებული სამრეკლოებზე, კვლავაც დარეკენ და მიიტანენ თითოეულთან ჩვენი სიყვარულის ხმას, ჩვენს ურთიერთსიყვარულს ყველასთან მიმართებაში, მათი რელიგიური აღმსარებლობის მიუხედავად!
ჭეშმარიტად, ამ დღეების სისასტიკე ვერ გაგვაძევებს ჩვენი ქვეყნიდან – რამეთუ იგი არის ჩვენი ყოფა, ჩვენი არსი და ჩვენი გულის ნაწილი!
შექმნილი ვითარების გამო და ჩვენი და-მონაზვნების და ობლების დაკავების გამო მაალულას თავშესაფრიდან, სამწუხაროდ იძულებულები ვართ, გაურკვეველი ვადით გადავდოთ ჩვენი შეხვედრა ჩვენს სამწყსოსთან სპარსეთის ყურეში, რომელიც იგეგმებოდა ამა წლის 16-17 დეკემბერს, და დავბრუნდეთ დამასკოში, რომ ყველაფერი ვიღონოთ, ზემოთ აღნიშნული პრობლემების გადასაჭრელად. ამიტომ მე მივმართავ და მივესალმები თითოეულ ჩვენ შვილს იმ მხარეში, ასევე ვინც შრომობდა ამ შეხვედრის ორგანიზებისათვის, და ვიმედოვნებ, რომ ეს შეხვედრა შედგება უახლოეს მომავალში. მე გთხოვთ პატიებას ჩემო შვილებო, ასე დიდხანს ელოდეთ ამ დროს, აკეთებდით ყველაფერს შეხვედრის ორგანიზებისთვის, თქვენი ჯანმრთელობისთვის ვლოცულობ და მოვიხმობ ღვთის წყალობას თქვენზე.
დაიცვას უფალმა სირია, ლიბანი, აღმოსავლეთი და ყოველი ადამიანი აღმოსავლეთისა!
ვმადლობ საინფორმაციო საშუალებებს, რომლებმაც საშუალება მისცეს მსოფლიოს გაეგო ანტიოქიის ტკივილი.“
სპეციალურად საიტისთვის თარგმნა ივანე ეპიტაშვილმა